Siet eenunveertig Johren gifft dat plattdüütsche Theater in’t Vörjohr bi de Nordsee Akademie. Wo kriegen jem dat hen? Wat is dat Geheemnis för jemme Erfolg?
Glieks na de Wessel vun dat ole Soldatenheim na de Nordsee Akademie (wat domals noch Heimvolkshochschule heten hett) hebbt wi us in de schöne Festsaal mit de grote Bühne wunnerbor opnahmen un willkamen föhlt. De Weertschätzung för unse Theaterarbeit vun de ganze Akademie un unse true Publikum motiveert uns jedet Johr, en nie‘e plattdüütschs Theaterstück op de Bühne to bringen. De Tietopwand för is dorbi enorm. Glieks na de Saison lesen enige vun uns Rullenböker un besluten denn tosamen, welke Stück wi as neegstet spelen doot. Vun September an fangt dat Text lesen un lehren an. Twüschen Wiehnachten un Silvester warrt de Bühnenopbu kloor maakt. So köönt de Proven in de Januar direkt op de Bühne anfangen. Dat geiht locker to, mit Konzentratschoon, un vör allens mit grote Speelfreud. De Hölp vun all Lüüd is grot, op de Bühne as ok dor achter. Wi trecken all tosamen an een Strang, blots so is dat mööglich över so vele Johren jedet Johr vele Minschen för unse Theaterstücken to begeistern.
In düt Johr heet dat Stück „In'n Heven is keen Stuuv free“. Wo könen wi uns op freuen? Woso hebben jem dat Stück utsöcht?
„In’n Heven is keen Stuuv free“ is en lebennige Stück in 2 Törns mit en korte Prolog vörweg, in de dat „himmlisch“ togeiht. „Erdisch“ warrt dat denn vun de 1. Akt an, dor kummt allerhand dörchenanner un chaotische Verwesseln warrn na un na oplööst. Um dat Utsöken kümmern sik dree Lüüd ut unse Vereen, de um un bi twinitg Böker dörcharbeiden. Dorbi is to bedenken, dat dat Stück ok to de Mitspelers passt, de sik vörher mellt hebbt un in de neegste Saison mitspelen wüllt. De Rullen mööt för de Tall an Fruenslüüd un Mannslüüd un umbi för emme Öller stimmen. Dat is nich ümmer eenfach, aver, schallst di wunnern, dat löppt sik opletzt ümmer torecht un dor finnt sik en schöne nie‘e Stück.
Jem schrieven op jemme Websteed: „Plattdüütsch is hier bi uns in'n Noorden nu eenmal unse Mudderspraak, de ok Heimat bedüüdt.“ Wat bedüüdt dat hüüt för jem?
Kloor versöken wi mit unse Spelen Plattdüütsch wieder to verbreden un ok in’t däägliche Leven to bruken, indem man anner Lüüd glieks up Platt ansnackt. Dat maarkt man al in’t Foyer – an de Gordroov – bi de Koorten- un Getränkeverkoop – un bi unse Los-Aktschoon. Dor geiht dat richtig plattdüütsch to. Swoor is dat, wenn man sik op Hoochdüütsch kennenlehrt hett, op Platt umtostiegen. Dat geiht uns in de Grupp ok so. Aver wenn man sik vörnimmt, eenfach Plattdüütsch op de anner totogahn, freuen sik beide Sieden. Umswitchen kann man ümmer noch. Denn Plattdüütsch is ja keen Dialekt, sünnern gellt as Spraak.
In de Nordsee Akademie hebben wi Gäst, de keen Plattdüütsch snacken oder verstahn. Wie maken jem för düsse Lüüd jemme Theaterwelt togänglich?
Jeder is bi uns hartlich willkamen, ok Lüüd, de nich Plattdüütsch snacken. Bi uns hebbt al hochdüütsche Lüüd för dat Spelen Plattdüütsch lehrt un dat goot torechtkregen. Aver ok achter de Kulissen hölpen vele Lüüd, dat allens rund löppt. Dor höört de allgemene Organisatschoon jüst so to, as dat Versorgen vun de Spelers (al bi de Proven dörv dat nie an Leckerkraam fehlen), de Inladens för Ehrengäste to de Premieer, de Technik, Maske, Bühnenbu un vele Hölpers in’t Foyer, dat unse Publikum sik bi uns wohlföhlt. Dat weer richtig schöön, wenn sik Lüüd mellen worrn, de Spaaß dor an hebben, wat Nie‘es in en dulle Team to beleven. Informatschonen to uns finnt man in de Presse (SHZ, Wochenschau), bi Instagram un op unse egen Homepage www.plattduetsche-ring.de. Natürlich kann man ok eenfach een von unse Mitglieder ansnacken. Wi freuen uns ümmer över Towass.
Velen Dank un allens Gode för düsse Theatersaison – toi toi toi!
